Први во светски рамки – Даријан Шекеров ученик при ООУ „11 Октомври“-Скопје, Центар

​На Светскиот младински натпревар за иновативни решенија 2016 (World Summit Youth Award 2016), каде учествуваа над стотина земји од целиот свет со неколку илјади апликации и проекти поделени во 6 категории, апликацијата „Слико збор“  (Picture Word) на ученикот Даријан Шекеров победи во категоријата „Борба со болести“ (Fight Poverty, Hunger & Disease).
„Слико збор“ е прва македонска апликација наменета за помош на децата со попреченост во говорот, оние со аутистичен спектар (аутизам) и за лицата без моќ на говор во секојдневната комуникација со блиските во семејството и надвор во околината. Создадена во соработка со здруженијата во кои членуваат лицата со попреченост во говорот, и кои велат дека оваа апликација претставува големо олеснување во комуникацијата.
Даријан Шекеров е ученик во 9-2 одд. при ООУ „11 Октомври“-Скопје, Центар. Покрај училишните обврски, тој од својата 10-та година се занимава и со информатика и програмирање. Неговите андроид апликации може да се најдат и симнат на Play Store. Има учествувано на неколку натпреварувања по информатика од регионален и од државен карактер  и е познат по тоа што во информатичките науки често освојува награди во конкуренција со многу повозрасни од него.